Во галеријата „Мала станица“, во вторник (26 јуни), ќе се отвори изложбата со наслов „Плакатот во Националната галерија на Македонија“.

На изложбата, чиј почеток е закажан за 20 часот, првпат во седумдецениското постоење на Националната галерија ќе бидат изложени плакатите дизајнирани по повод сите изложби во текот на повеќе децении, кои опфаќаат период од петата деценија на минатиот век, па до денес.

Најстариот изложен плакат е од далечната 1955 од изложбата на големиот Хенри Мур, одржана во Даутпашиниот амам, каде што е основана и Уметничката галерија на Македонија со својата поставка во далечната 1948 година.

„Преку оваа изложба на плакатот се потсетуваме на низа ретроспективни претставувања на уметниците од основоположничката генерација – Личеноски, Мартиноски, Пандилов, Лазески… Димо Тодоровски, самостојни изложби на професорите од Факултетот за ликовна уметност – Мазев, Шемов, Хаџи Бошков. Значајни за Националната галерија се претставувањата на престижното Венециско биенале на уметноста, каде што сме изложувале повеќепати, изработени се плакати што може да се видат на оваа изложба, потоа соработката со сродни институции од странство и со нашите центри во САД, Бугарија, како и со градот Нирнберг“, се наведува во најавата на Националната галерија за овој настан.

Оттаму додаваат дека дизајнерскиот тим на националната установа за секој проект изработува соодветен плакат во координација со уметникот или кураторот.

Изложбата, која ќе трае во текот на јули, ќе ја отвори директорката на Националната галерија на Македонија, Дита Старова-Ќерими, а организацијата е на вишиот кустос Маја Крстевска.

Текстот Плакатите од Националната галерија на Македонија на изложба во „Мала станица“ е превземен од МАКФАКС.

Јане Бакрески, доцент по визуелни уметности на Универзитетот за информатички науки и технологии „Св. Апостол Павле“, Охрид, кој веќе една година е визитинг професор на Универзитот КваЗулу-Натал, Јужноафриканска република, во перидот од 22 до 30 јуни, со свои уметнички инсталации и предавање учествува на Интернационалниот симпозиум за електронска уметност (ISEA), во Дурбан, Јужноафриканска република.

Инсталациите со наслов „Аугментативна апстракција“ и „Голем човек“ своите почетоци ги бележат уште во 2016 година. Првата изложба на „Аугментативна апстракција“ се одржа на Фестивалот „Охридско лето“ во просториите на Универзитетот „Св. Апостол Павле“ во Охрид, поддржана од менаџментот и од двете институции, предизвикувајќи со својата иновативност интерес кај пошироката уметничка јавност.

И двете инсталации се зафаќаат со предизвикот на односот помеѓу уметноста и технологијата, кој доаѓа како природен резултат на интерестот и работата на Бакрески, не само до традиционалниот, туку и со дигиталниот медиум. Тие визуелно го толкуваат проблемот на односот на човекот со себеси, со светот, техниката, уметноста, допирајќи актуелни прашања и нудејќи еден естетски одговор. Бакрески и понатаму ќе продолжи да ја интегрира технологијата во уметноста како во својата уметничка, така и во својата образовна дејност.

Универзитеот КваЗулу-Натал каде во моментов работи Бакрески е меѓу најдобрите петстотини во светот спред Шангајската листа.

Текстот Уметникот Јане Бакрески учествува на престижниот Интернационален симпозиум за електронска уметност е превземен од МАКФАКС.

Со почеток во 20 часот во Изложбениот салон на НУ Центар за култура „Трајко Прокопиев“ – Куманово ќе биде отворена изложба на фотографии „Морски импресии“ од авторот Рајко Р. Каришиќ од Белград – Република Србија.

Рајко Р. Каришиќ роден е на 5.11.1952 година во Бачко Добро Поље, општина Врбас. Дипломирал на Машинскиот факултет на Универзитетот во Нови Сад. Со фотографија почнал да се занимава од април 1973 година во Фото-кино клубот „Машинац“ на Машинскиот факултет во Нови Сад. Досега имал околу 100 самостојни изложби во својата земја и во странство: Белград 1998, 2003, 2008, 2011; Заечар 2005; Котор 2005; Пале 2007, Нови Сад, Врбас, Кула, Кикинда, Сирогојно, Петровац на Млави, Неготин, Ниш 2010; Чигота – Златибор 2003, 2011; Москва (Русија) 2010 во рамките на VIII Меѓународно биенале на фотографијата; Нови Бечеј 2011; Куќата на Ѓура Јакшиќ во Белград 2011, 2015; Гевгелија 2011, 2013, 2015; Кавадарци (Македонија) 2015; Санкт Петербург (Русија) 2012; Лозница 2012, 2014; Александорвац Жупски 2013; Нови Бечеј 2013; „Галерија 73“ во Белград 2014; Галерија на РТС во Белград 2015; ЦЛУ „Гварнериус“, Белград 2015, а учествувал и на над двесте колективни изложби во својата земја, но и Канада, Австрија, Шпанија, Романија, Унгарија, Црна Гора, Македонија, Република Српска и др. Носител е на високото звање Кандидат мајстор на фотографијата на Фотосојузот на СЦГ. Досега има изработено 98 авторски книги и фотомонографија. Покрај овие публикации, обработил и реализирал 21 минимонографија на манастири и цркви на Српската православна црква. Учествувал и во изработката на над 10 други монографии и реализирал над 100 каталози и плакати за своите изложби, за изложбите на познати сликари, каталози за ликовни колонии и собири. Активно учествувал и во работата на над 80 ликовни колонии и собири.

Текстот Изложба на фотографии „Морски импресии“ во Куманово е превземен од МАКФАКС.

Меѓународниот саем на уметност„Ин Ситу“,- досега познат како „Паратисима Скопје“, за својот прв јубилеј на своето петто издание оваа година се ре-брендира, постанувајќи единствен независен саем на уметност од овој вид и размер во Македонија.

Петтото издание на саемот ќе се одржи од 13 до 15 септември во Младинскиот културен центар, Скопје.
До сега саемот брои претставување на повеќе од 450 автори учесници кои потекнуваат од 39 земји, чии дела ги проследи растечки број  посетители кој во првите две години броеше 2-3000 посетители за да прерасне кон 5-7000 посетители кон четвртото издание на саемот.

Повикот за учество во изложбената поставка за дизајн, под кураторство на Драган Христов – Лудус, ќе биде отворен до 20 јули. „Ин Ситу воспоставува комуникација помеѓу ‘локалното’ и ‘меѓународното’ по повеќе основи; пред сѐ во контекст на исклучителните и сериозни соработки вклучени во процесот на презентирање на поставките и програмата, потоа преку квалитетот на условите за изложување на независната сцена, а воедно и во однос на разновидната програма која не само што создава нова, многубројна публика и ја одржува љубопитноста туку ја пласира македонската сцена како рамноправна со меѓународната. Во улога на културен катализатор, Ин Ситу го премостува и нашиот локален јаз, обединувајќи ги различностите во изразувањето, потеклото, познанствата, возраста, академската поткрепа и сите други ‘формалности’ кои досега беа (зло)употребувани како изговор за професионална видливост и творечка препознатливост“, вели Бојана Стојменовска, организатор на саемот за уметност „Ин Ситу“.

„Ребрендирањето на саемот е почеток на ново поглавје каде што фокусот ќе биде квалитетот во понатамошниот развој на популарниот саем. Ги поканувам сите дизајнери кај нас, регионот и пошироко и ги охрабрувам да ги претстават најновите колекции, производи и прототипи пред нашата многубројна публика и да ја искористат единствената можност што ‘Ин Ситу’ ќе им ја понуди како саем со интернационален карактер, голема посетеност и награди од различен вид“, изјави Драган Христов.

Тричлено жири ќе биде селектор на учесници кои ќе бидат наградени со независни изложби, учество на меѓународни саеми надвор од Македонија и можности за професионален развој и претставување.
Овогодишната програма на саемот ќе содржи три програмски единици: уметност, дизајн и архитектура, проследени со off-програма од предавања, работилници, проекции и музички настапи во соработка со национални и меѓународни автори и организации.

Текстот Отворен повикот за учество на најголемиот саем на уметност во Македонија, „Ин Ситу“ е превземен од МАКФАКС.

Во Младинскиот културен центар во Скопје вечерва со почеток од 20 часот ќе биде отворена самостојна изложба на ликовниот уметник Иван Ивановски. Во серијата цртежи и слики насловени „Симптоми“, според кураторката Јованка Попова, Ивановски го третира сепството како темелно конструиран субјект, создаден и одржуван од мрежи на културни, историски, интелектуални и морални дискурси, кои ги манифестираат односите на моќ во капиталистичкиот поредок.

На отворањето на изложбата музички перформанс ќе изведе авторот Masculinity. Изложбата е поддржана од МКЦ Скопје и Министерството за култура.

Иван Ивановски e визуелен уметник, кој дипломирал вајарство на Факултетот за ликовни уметности во Скопје, а се образува и на Академската програма за режија на Ф.А.М.У., Р. Чешка. Добитник е на наградата „Денес“, за млад ликовен уметник. До сега има реализирано 17 самостојни и повеќе групни изложби во Македонија и странство. Работи скулптури, цртежи, инсталации, слики и видео, филм и анимација. Дел од неговите филмови се претставени и наградени на различни регионални и интернационални филмски фестивали.

Текстот Самостојна изложба на Иван Ивановски во МКЦ е превземен од МАКФАКС.

Во Музејот на современата уметност во Скопје, утре, во 20.30 часот, ќе биде отворена изложбата „Ти си мобилна архитектура“ на Ирена Пејовиќ. Изложбата е осмислена како мултисензорен настан кој кореографира движења преку комбинирање облека, модуларни форми, предлози, како што се фотографскиот објект и звукот како место, материјалноста како настан, техниките на организација во природата и организација на луѓето, и она што се појавува.

Пејовиќ создава настани што водат надвор од визуелниот аспект кореографирајќи движења што ја претвораат публиката во истражувач на еден свет кој е активен и во создавање, како збир на релациони односи, на начин на кој тие го немаат доживеано претходно. Во нејзините дела публиката се движи со сензори користејќи вид, звук, навигација, чувство на текстура, боја, големина и е подвижна и неподвижна. Делата, просторот и гледачот земаат рамноправен дел во изработката на настаните.

За нејзините дела, Бен Дејвис, национален критичар, за „Артнет њуз“ ќе напише: „Нејзиниот интерес за танцот и импровизираните движења се дестилира во средини кои навидум се ултраделикатни и робусни. Пејовиќ ја развива идејата за скулптура не како фиксен збир од објекти туку како релации што секогаш се одвиваат, кои влијаат и се под влијание на начинот на кој гледачите се движат низ нивните параметри. Транспарентните материјали прикриваат суптилни движења и случајности што доаѓаат во фокусот за потоа да се распаднат во истрагата; на суптилен начин од оваа средина се појавуваат тактилни и аудитивни компоненти кога таа е истражена нагласувајќи ја концепцијата на уметноста како производ на холистичко искуство поголемо од кој било од неговите делови“.

Ирена Пејовиќ, родена 1981 година, Гевгелија, Република Македонија; живее и работи во САД. Дипломира и магистрира ликовна уметност на Државниот универзитет „Монтклер“. Неодамна, во 2016 година, Пејовиќ беше дел од перформансот SWIM на американскиот уметник Роберт Витман, презентиран во галеријата „Фридман“ во Њујорк, а реализиран во соработка со Фондацијата „Диа“ и со Џули Мартин, директор на „Експерименти во уметноста и технологијата“; истиот перформанс, на кој Пејовиќ исто така учествуваше првпат, беше изведен една година претходно, во 2015, во театарот „Александар Касер“ во Монтклер. Селектирани самостојни изложби има одржано во: галеријата „Ненси Дрифос“ на Универзитетот „Кин“ во Њу Џерси; галеријата „Карас“, Загреб, Хрватска; галеријата „Аферо“, Неварк, Њу Џерси; галеријата МЦ во Њујорк. Пејовиќ е добитник на неколку значајни награди за својата уметност – 2018 година: Државната награда за индивидуални уметници од Советот за уметности на Њу Џерси; 2014 година: Наградата од Обединетата македонска дијаспора: Џон Битов Македонско културно наследство; 2013 година: Step Beyond Travel Grant од Европската културна фондација. Вонреден професор е на Државниот универзитет „Монтклер“ и на Универзитетот „Кин“ во Њу Џерси, САД.

Текстот „Ти си мобилна архитектура“, мултисензорен настан на Ирена Пејовиќ во МСУ е превземен од МАКФАКС.

Вечерва, од 20.30 часот, во амбиентот од преубавата надезерска и крајезерска Трпејца, започнува традиционалното, годинава седмо по ред, културно-забавно лето – „На зајдисонце – Трпејца 2018“.

На чинот на свеченото отворање на манифестацијата „На зајдисонце“, на веќе позната сцена „Кај бунарот“, ќе биде отворена изложба на уметнички дела од Свето Стефановски, новинар, публицист, екологист и ликовен уметник.

Последниве години Стефановски живее на релацијата помеѓу Скопје и Охрид.

Ликовната кртика за него ќе забележи: „Делата на Свето Стефановски имаат препознатлив стил и јазик со изразита енергија. Широка е палетата на неговото изразување. Кај него ќе најдете и пејзаж, и стара чаршија, и Охрид, и цркви и манастири, ама и цвеќе. Тој не му робува на традиционалното сфаќање на догмите за сликарството. Ослободен е од пресликување на стварноста. Природата кај него е дематеријализирана“.

– Свето Стефаноски е уметник во чиии ликовни оствартувања може да се препознаат експресивни моменти, а кои авторот ги изразува со силен естетски и душевен порив. Чистототата во неговите слики е толку јасна, што пораките се надовруваат една врз друга, успешно давајќи ни многу повеќе од она што го знаеме. Свето Стефаноски се движи, уметнички созрева кон една содржина, вертикала и височина, што наредниве години ќе го внесе во најпознатите галерии во земјата и светот – вели познатиот ликовен уметник Јордан Манасиески.

Вечерта со својот настап ќе ја збогати и сè популарното музичко и од неодамна брачно дуо ДИС – Денис Мурат и Стефани Стефановска од Скопје.

Текстот Иложба на Свето Стефановски на „На зајдисонце – Трпејца 2018“ е превземен од МАКФАКС.

Секој вторник од 14 август до 4 септември, од 19 до 19.30 часот, ликовната уметница Марија Џунова од Велес, ќе го претставува своето арт-видео на видеобимот постевен надворешно на ЦК Театар „Ј.Х.К Џинот“ од Велес.

На арт-видеото е документиран прерформансот „Мантра за секогаш мрсни времиња за професорот и Герил Брутски“, одржан на 10.10.2017 година во Пешти, Велешко. Содржината на перформансот е палење на книгата „Авторски низ појавното 1-5“, лист по лист.

На прашањето зошто видеото не се изложува во галерија или музеј, авторката Џунова смета дека изложувањето на ова дело во отворен простор ќе овозможи понепосереден контакт со консументите/публиката.

Текстот Ликовната уметница Џунова претставува арт-видео во Велес е превземен од МАКФАКС.

Синоќа во Центарот за култура АСНОМ во Гостивар се одржа завршната изложба на дела од 13. меѓународна ликовна колонија „Гостивар 2018“.
Во рамките на изложбата беа претставени 35 дела масло на платно и акрил на платно на уметници од Украина, Косово, Албанија, Јужна Кореа, Босна и Херцеговина, САД, Бугарија, Црна Гора, Турција, Србија, Франција и од Македонија, кои изминатава недела се инспирираа и твореа во гостиварскиот регион.

Специјален гостин на годинешното издание на ликовната колонија во Гостивар, која традиционално ја организира Здружението на ликовните уметности „Драудакум“, беше познатиот уметник со македонско потекло и светска кариера, Омер Калеши, кој живее и твори во Франција.

Текстот Завршна изложба на дела од ликовната колонија „Гостивар 2018“ е превземен од МАКФАКС.

Во Галеријата на МКЦ во 20 часот ќе се отвори изложбата „Сопство“ на Симона Манчева. Таа е родена 1989 во Кавадарци. Во 2011 дипломира на Факултетот за ликовни уметности во Скопје, 2013 завршува магистерски студии оддел сликарство.

,,Сопство е концептот што го имаме за себеси. Сопство е сѐ она што ја прави една личност. Декарт вели ‘Мислам, значи постојам’, додека Барбара Кругер вели ‘Купувам, значи постојам’. Овде е прикажано физичкото и мислечкото битие на човекот. Низ историјата човекот го менувал концептот за себеси.

Умствениот капацитет на човекот е менувачки и минлив, исто како и телото. Сѐ до ренесансата сопственик на нашите тела се сметал Бог. Телото како убаво и добро, чиј сопственик е човекот, се појавило со деконструкцијата на групните идентитети, со порастот на индивидуализмот и слабеењето на црквата.Атрибуираниот, субјективниот и оптативниот идентитет се „зависни“ од телото, од биолошкиот идентитет. Од самото раѓање (пол), па низ целиот живот (здравствена состојба, возраст) ние се бориме со ограничувања за тоа каде, како (ни доликува) треба да се однесуваме.Изворот на нашите ставови и задоволства пред сè ментален или телесен? Телото е наш понекогаш верен, понекогаш палав, а понекогаш предавнички настроен придружник.

Моите уметнички интереси се базираат на согледување на фиктивната реалност и уште пофиктивниот морал во општествата.Преку своите истражувања се обидувам да ги прикажам и разнишам нашите стегнати предрасуди и стереотипи, кои ги зајакнуваат границите на нашата слобода, истовремено и да се развие свесноста на луѓето за остварување на своите права и задоволување на своите потреби. Родовата дискриминација, наследените стереотипи, родовиот, сексуалниот идентитет, социјално маргинализираните групи, различноста и варијациите на човекот и неговото тело се цел на моите истражувања каде што разбирањето на сите контрадикции и стереотипи како уметник и улогата на уметноста да се интервенираат и да се преиспитаат овие општествени конструкти”, вели авторката.

Текстот ,,Сопство” – изложба на Симона Манчева во МКЦ е превземен од МАКФАКС.

Од 5 до 20 декември во Хонг Конг се одржува изложба на скулптури на академскиот скулптор Алексадар Ефтимовски со наслов Continuity, со која завршува неговиот петмесечен академски престој во Хонг Конг. Ефтимовски за време на својот престој на Факултетот за визуелни уметности на Универзитетот „Лингнан“, предаваше разни техники на изработка на скулптура.

Како дел од резиденционалната програма на Универзитетот, покрај предавањата, Ефтимовски работеше и на свои скулптури – апстрактно геометриски, кои ги изложи на изложбата. Името на изложбата во Хонг Конг со наслов Continuity го претставува континуираниот пат на творење на авторот. На изложбата, покрај делата на Ефтимовски, беа изложени и скулптури, создадени од неговите студенти во периодот на неговиот престој.

Александар Ефтимовски е автор што своето ликовно знаење го стекна на академиите за уметност во Фиренца и Карара, Италија. Неговото творештво во голем формат е поставено во повеќе од 15 града во светот. Дел од неговите дела се откупени во колекциите на NAMOC (Национален музеј на уметност на Кина), International Art Exhibition Xi’аn, како и поголем број приватни колекции во Германија.

Текстот Изложба на академскиот скулптор Александар Ефтимовски во Хонг Конг е превземен од МАКФАКС.

По повод 16 дена активизам против родово базирано насилство, ќе се одржи изложба на фотографии – ,,Викторија’’ во 20:00 часот, во организација на Хелсиншкиот комитет за човекови права и ЛГБТИ-центарот за поддршка Скопје, во соработка со шелтер-центарот ,,Сигурна куќа” и платформата за феминизам ,,Медуза”. Изложбата ќе биде поставена во кафе-бар ,,Синдикат’’, а следствено и на веб-страницата Медуза.мк – нова феминистичка платформа на македонски јазик.

Изложбата, која е дело на Христина Христова, се состои од 10 фотографии од жртви на родово базирано насилство и насилство поради сексуална ориентација и истите ќе бидат на продажба за време на настанот. Фотографиите се со придружна приказна напишана од страна на девојки и жени кои секојдневно се борат со искуството од кое нема криење.

Текстот Изложба на фотографии на жртви на родово насилство е превземен од МАКФАКС.

Во фоајето на Македонски народен театар, на 18 декември, непосредно пред премиерата на претставата „Галеб“ закажана за во 20 часот, ќе биде отворена и изложба со која ќе биде одбележан јубилејот на доајенот на македонското актерство – Петре Арсовски.

Изложбата „Петре Арсовски, 50 години театар“ е визуелно сведоштво за живот на сцената на актерот Петре Арсовски. Преку фотографии, плакати и останати експонати на дел од претставите во кои игра, а се во продукција на МНТ, целта е да се прикаже развојот и низата остварени ликови на еден од најпочитуваните актери во македонското глумиште и „жива легенда“ на македонскиот театар и филм.

Петре Арсовски дебитира во „Венецијански трговец“ како Првиот полицаец во 1968 година, моментално игра во „Разговори во четири очи“, ликот на Чичко Јакоб, а со ликот на Петар Николајевич Сорин во „Галеб“ на А.П. Чехов одбележува 50 години на оваа сцена. Преку остварените ликови на Арсовски на сцената на МНТ се испишува и еден дел на историјата на театарот во кои тој своите ликовите ги реализира на начини кои го вреднуваат на најпрепознатливо ниво.

„Со постојаноста на квалитетот на сцената, видлива и во експонатите, изложбата дава поглед на актерските реализаци на Арсовски преку кои тој е запаметен/се памети како актер кој се гради, а на сето изминато време му дава значаен белег. Во сите претстави, преку играта и умеењето да се фати во костец со секој лик, без разлика дали е голем или мал, тој плени со својата ненаметлива снага, одмереност, посветеност и умеење да се фати во костец со секој доверен нов лик“, се вели во најавата за изложбата.

Текстот Изложба „Петре Арсовски, 50 години театар“ во МНТ е превземен од МАКФАКС.

Во изложбениот салон на НУ Центар за култура „Ацо Шопов“-Штип, на 18.12.2018 година (вторник) со почеток од 12 часот ќе биде отворена изложбата на скулптури „Констелации во уметничкиот универзум“, од авторот Слободан Милошески.

„ Во строго формална смисла, динамизмот кај скулптурата на Милошески е тројно акцентиран: прво, илузијата на поместено гравитационо тежиште ја генерира севкупната динамична творба; второ, самите елементи од кои е сочинета целината дополнително ја интензивираат самата динамика на целината: чиниш авторот прво ја конструира, ја повикува, т.е. тендира кон структурата, за да ја деконструира потоа низ потенцирањето на самите елементи од кои таа е соткаена; и трето, кај авторот не е важна само оваа морфологија, ами своја улога има и текстурата и бојата на формата, со што движењето станува целосно сугерирано од сите овие контрасти, што го чини комплетно естетското доживување. Но, конечно и можеби најважно, неговата скулптура има изразен динамизам во кој дури и гледачот е вклучен. Со тоа, естетитиката на овие дела станува комплетна затоа што станува и естетика на рецепцијата. Гледачот е повикан да учествува во тој динамизам, станувајќи просто вовлечен во растот со што овие, на прв поглед, рационални форми, сепак се доживуваат како длабоко човечки движења во потрага по спокојот. Иако геометриско-кубистички, делата на Милошоски сепак се човечки, премногу човечки“, вели естетичарот Трајче Стојанов, во својата критика по повод оваа изложба.

Слободан Молошески, дипломира на Факултетот за физичка култура во Скопје во 2001 година. Во 2009 година дипломира на Факултетот за ликовни уметности во Скопје на вајарски оддел, а магистрира на истиот факултет во 2011 година. Во 2018 година докторира на Национална уметничка академија во Софија, Р.Бугарија, на катедра „Скулптура“. До сега има реализирано 18 самостојни изложби , а учествувал на повеќе од 60 групни изложби во земјава и странство.
Добитник е на 13 награди и признанија, од кои најзначајни се наградата за скулптура „Јордан Грабул“ доделена од Друштво на ликовни уметници на Македонија во 2012 и 2014 година, како и наградата за скулптура мал формат „Димо Тодоровски“ исто така доделена од ДЛУМ во 2014год.
Во неговата биографија се забележливи реализираните скулптури во простор меѓу кои: Скулптура на Живо Чинко, Ристо Шишков, Спомен облежјето на Првото заседание на АСНОМ, Скулптура на Кузман Шапкарев, Јоаким Крчоски, Муза (наменета за фасада на објектот „Стар театар“) како и две скулптури наменети за фасадата на објектот на МНР.

Авторот Милошески е член на ДЛУМ од 2009 година, а во моментот работи како доцент на Ликовната академија во Штип. Изложбата ќе биде отворена до 28 декември 2018 година.

Текстот „Констелации во уметничкиот универзум“
 – изложба на скулптури на Слободан Милошески е превземен од МАКФАКС.

Во НЛБ Галерија во Скопје, денеска (17 декември) свечено ќе биде отворена изложбата на уметнички дела на Меѓународната ликовна колонија „Вевчански видувања“ 2018.

„Мозаик од бои“ е насловот на каталогот кој оваа колонија го изготвува традиционално пред изложбата во Скопје и истиот ќе можете да го погледнете токму на отворањето на изложбата. Во него има воведно обраќање на организаторот, самите дела кои се насликани на овогодишната Меѓународна ликовна колонија „Вевчански видувања“ 2018, како и информации за уметниците. Истиот се издава на македонски и англиски јазик.

Инспирацијата за творење во Вевчани и оформување на своите врвни уметнички дела таму годинава ја најдоа уметниците Ацо Станкоски, Ефтим Ристов, Никола Пијанманов, Ставре Димитров Стадим, Ниче Василев, Станко Георѓиески, Доне Милјаноски, Живко Попоски Цветин, Дамјан Затуроски, Цветанка Јованова и Петар Попчев од Република Македонија, како и уметниците Драгана Кнежевиќ (Србија), Светислав Савковиќ (Србија), Хо Ми Ан (Франција), Герард Гален (Франција), Златка Пентова (Бугарија), Анже Скалжунски (Полска), Јелена Савиќ (Србија), Бојан Савиќ (Србија), Јенс Линдвквист (Шведска), Осијан Теселиус (Шведска), Маркус Јохансон (Шведска), Петар Белишки (Бугарија) и Јуре Самец (Словенија).

Веќе 9. година на крајот на месецот јуни, во ресторанот „Виа Игнација“ во Вевчани се организира Меѓународната ликовна колонија „Вевчански видувања“. На оваа реномирана културно-уметничка манифестација имаат земено учество над 300 еминентни ликовни уметници од Република Македонија и од странство. Делата на оваа колонија до сега беа изложувани во светските уметнички центри како Њујорк, Москва и Париз.

Текстот Во Скопје изложба на уметнички дела од ликовната колонија „Вевчански видувања“ 2018 е превземен од МАКФАКС.

НУ Национална галерија на Македонија, во рамките на својата годишна јубилејна програма за 2018 година, организира ретроспективнaта изложба на Танас Луловски – Тане како еден од доајените на македонското современо сликарство, кој даде силен белег и остави неизбришливи траги во развојот и афирмацијата на македонската современа ликовна уметност. Изложбата ќе биде отворена на 20 декември во 19 часот во изложбениот простор на Даутпашиниот амам.

„На изложбата која претставува одбележување на повеќедецениското творештво и каракатеристичен авторски белег на овој наш еминентен сликар Танас Луловски – Тане, ќе бидат поставени дела (слики и цртежи) од сите фази од неговото творештво, кое почнува во 60-тите години на минатиот век. Со оглед на неговото големо значење и силниот и препознатлив белег кој беше инспирација за многу нови генерации на ликовни автори, а земaјќи предвид дека досега не е напаравено вакво ретропсективно прикажување, и покрај парцијалните претставувања на неговите дела во последните 10-ина години, оваа ретроспективна изложба ќе преставува своевиден пресек на неговото творештво укажувајќи на неговото исклучително значење за современата македонска ликовна уметност“, велат од Национална галерија на Македонија.

Изложбата ќе содржи слики и цртежи од разни творечки периоди на Танас Луловски – Тане. Делата што ќе бидат претставени се сопственост на семејството на авторот, на повеќе институции (НУ Национална галерија на Македонија, НУ Музеј на современата уметност, НУ Центарот за култура „Антон Панов“ – Струмица), како и на значаен број приватни сопственици. Изложбата ќе биде отворена до 20 февруари в година.

Текстот Ретроспективнa изложба на Танас Луловски – Тане во Даутпашиниот амам е превземен од МАКФАКС.

Во Ресенскиот сарај синоќа беше отворена изложбата „Економијата на Преспа низ вековите“ од Игор Ефтимовски, млад ресенец кој од неодамна е дипломиран археолог.

Во рамките на оваа изложба се претставени економските фази на развојот на Преспа во минатото почнувајќи од земјоделството како основна дејност уште од времето на неолитот пред 8.000 години. Опишано е и сточарството, а голем акцент е ставен на рибарството како дејност со која населението се занимава од памтивек. Покрај автохтоните риби, опишани се и чуновите со кои специјално се ловело риба во ова езеро.

„Целта на изложбата е да се сврти вниманието на јавноста кон економските гранки што традиционално, што, природно, во однос на живеењето на населението било одгледувано и работено во Преспа. Оваа изложба би сакал да ги инспирира луѓето денес да размислуваат што може да се работи, а може и да се отвори некоја нова компанија“, рече Ефтимовски.

На изложбата е опфатен и делот на производството на керамика во Преспанскиот Регион како важен сегмент од економијата во регионот, од што произлегува и ресенската керамичка колонија како членка на меѓународната академија за керамика при УНЕСКО.

Дел од изложбата е посветена и на бојаџиството, металообработката и трговијата. Ќе бидат претставени и монетите што циркулирале на територијата на Преспа во минатото.
Ова е прва изложба од ваков вид во Преспа, која има огромно значење за историските показатели во развојот на економијата на оваа територија. Организатор на изложбата е Домот на културата „Драги Тозија“ од Ресен.

Текстот Отворена изложбата „Економијата на Преспа низ вековите“ е превземен од МАКФАКС.

Во Музејот на македонската борба денеска беше отворена изложбата „Спомени од Првата светска војна“. На отворањето се обрати министерот за култура, Асаф Адеми.

Адеми пред посетителите, меѓу кои и амбасадорот на Република Франција во Република Македонија, Кристијан Тимоние, истакна дека светот годинава преку многубројни активности и иницијативи ја прославува 100-годишнината од крајот на еден од најдраматичните и најкрвави настани во човештвото, во кој учествувале повеќе од 65 милиони луѓе од 30 земји во светот и кој однесе 35 милиони жртви.

„Првата светска војна остави неизбришливи траги во колективната меморија на народите, а денешната изложбата е само еден од настаните со кои Република Македонија се приклучи кон светските иницијативи за одбележување на 100- годишниот јубилеј“, рече Адеми.

Тој додаде дека станува збор за тематска презентација на историските настани и процеси во земјава и во регионот претставени низ богатиот музејски фонд на пишани, визуелни, документарни и лични предмети, преку кои денеска дознаваме повеќе за животот во Големата војна, но и за војната во секојдневниот живот.

Изложбата се реализира со поддршка од Министерството за култура, а носител на проектот е Музејот на македонската борба во соработка со Музејот на Македонија и Заводот и музеј Битола.

Текстот Отворена изложбата „Спомени од Првата светска војна“ е превземен од МАКФАКС.

Националната галерија на Македонија во рамки на овогодинешната јубилејна програма по повод чествувањето на 70 години од постоењето, како завршна манифестација ја најавува изложбата на Петре Николоски насловена „Бесконечност (Infinity)“ која ќе се отвори на 27 декември во просториите на Чифте амам, во 19 часот.

Изложбата на Николоски се состои од повеќе мултимедијални дела и инсталации, кои се во најголем број изработени специјално и исклучиво во контекст на архитектонскиот и идеолошко – дискурзивен наратив на/зад Чифте амамот. Клучни дела се обелискот од книги и бесконечната полица, кои како машки-фалусоиден принцип е поставен во женскиот дел на амамот и комплексната инсталацијата од дрвен материјал, волница и коноп, кои обликуваат специфична, топла, вмрежена инсталација во облик на „утерус“, како симбол на женскиот принцип, позициониран во машкиот дел од амамот.

Првиот клучен објект – обелискот, како и бесконечната полица, се обликувани од книги кои беа набавени со алтруистички придонес на институции, издавачки куќи и индивидуалци, со што скулптуралното дело е обликувано со нетрадиционален скулпторски материјал. Авторот тежнее кон мултидисциплинарност, поместувајќи ги границите на класичната ликовна форма, имплементирајќи ја книжевноста и литературата, проширувајќи го кругот на публиката и иницирајќи ја соработката помеѓу институциите од различен профил.

Другата инсталација пак, која е конципирана да го повика посетителот да влезе во самиот нејзин облик, нуди посебни и однапред зададени патишта и правци на движење, во обликовен и формален смисол, нудејќи просторно опозитна линерна трансформација на арабеската и декорациите од куполата.

Во останатиот дел од амамот ќе бидат поставени видео инсталации, колажи – објекти и други просторни инсталации.

Изложбата ќе биде достапна за јавноста до средината на февруари 2019 година, а куратор на проектот е Ана Франговска, виш кустос.

Текстот Петре Николоски во Чифте амам со „Бесконечност“ е превземен од МАКФАКС.

Изложбата Celebrate Life/Емоции за еден град на дизајнерот Горан Костовски – Ind.o.g. ќе биде поставена на 18 јануари 2019 година во галеријата „Акантус“ во Дебар Маало со почеток во 20 часот.

Изложбата опфаќа илустрации кои што се цртани во периодот од 2014 до 2017 година. Секоја од нив засебно е карактер кој пренесува по некоја мисла за надеж и повторно оживување на самиот град, како и што претставува градот за луѓето и како тие би го подобриле во иднина. Илустрациите се инспирирани од реални ситуации од секојдневието и го коментираат загадувањето на воздухот во Скопје со ПМ10 честички кои што во изминатите десет години е од два до четири и пол пати повисоко од граничните вредности пропишани од ЕУ за квалитет на воздухот. Загадениот воздух е токму темата која што ќе ја обработува изложбата, а истата е инспирација и за новата капсулна колекција на дуксери која што ќе биде промовирана во рамки на изложбата.

Изложбата ќе биде отворена до 29 јануари 2019 година, a проектот е финансиран од Фондација Отворено општество – Македонија.

Што е Celebrate Life:

Celebrate Life е создаден во 2011 година како платформа за дизајнирање на unisex облека и разни дизајнерски предмети и едукативни работилници. Покрај практичниот аспект, платформата има
и филозофија зад себе – да се избегне мрачната и неподнослива состојба во секојдневието и да се потсетат луѓето на моментите кога танцуваат и ги слават убавите нешта. Стилски различни, но оптимистични, парчињата од концептот Celebrate Life имаа за цел од првата продукција на маици, дел од средствата собрани од продажбата да бидат наменети за бездомните животни и за луѓе на кои им треба некаква помош. Секоја колекција со себе носи разни позитивни промени во општеството, а тие секогаш се претставени на убав начин кој што има за цел да им ги доближи овие прашања на луѓето наоколу.

Горан Костовски – ind.o.g е арт директор, дизајнер и видео уметник роден 1983 година во Скопје. Свое дело првпат изложил во 1998 година, а оттогаш до денес учествувал во низа самостојни
и групни презентации, како и видео перформанси. Изложувал во Скопје, Париз, Амстердам, Берлин, Цеље. Во 2016 година ја реализираше изложбата Емигрирани во слобода дел од Културните приказни на Европската комисија во Скопје. Во 2010 година беше одговорен за визуелизациите на гала-отворањето на јубилејното 50 издание на фестивалот „Охридско лето“. Во 2007 година во галеријата „Точка“, во рамки на фестивалот за урбани уметности „Kонструктор“, ја имаше изложбата на графички дизајни и видео-арт насловена Human Communication. Ind.o.g живее и работи во Скопје.

Текстот „Емоции за еден град” – изложба за подобро утре е превземен од МАКФАКС.